اهدا يا قلبي

-1-

اشلونكم

اشتقت لكم

تأخرت عليكم بس توني فقت من الصدمة !!

مابي اتكلم عن نتايج الانتخابات لأن كلكم شفتوها و ساهمتوا فيها بشكل مباشر و غير مباشر .... فاز من فاز و خسر من خسر ... مع اني كنت اتمنى اشوف (تغيير) على قد (التحلطم و التذمر) .. و كل اللي اتمناه من نوابنا الأفاضل انهم يهتمون بقضايا التنمية و تطوير البلد بعيدا عن الحلال و الحرام ... واللي يبي يعلمنا الحلال والحرام خل يتنازل عن كرسيه و يصير خطيب مسجد

-2-

كنا مجموعة ما تربطنا قرابة ولا حتى اي معرفة سابقة
بتقولون شنو اللي جمعنا !!

جمعنا (المبدأ) ... المبدأ اللي صار مفقود عند أغلب الناس

اجتماعنا رسالة واضحة تعبر عن مدى حرصنا على مستقبل بلدنا

(علي ... مطلق ... زينب ... خزنة ... خديجة ... هديل ... خالد .. نورة ... مريم ... أنور ... لطيفه... نوف )
اجتمعتوا بالرغم من اختلاف مذاهبكم و اطيافكم و قبائلكم
اجتمعتوا و شكلتوا توليفه جميلة من الحان مختلفة راح تظل تتغنى بحب الكويت مهما تعالت أصوات النشاز الطائفية و الرجعية

زميلاتي و زملائي بالعمل الوطني
(شكرا لكم من القلب)
كفيتوا و وفيتوا و كنتوا خير مثال للشباب الكويتي ... التزمتوا بنظافة حملتكم ومبادئكم
نعم خسرنا ...
لكن خسرناها بشرف

نعم فشلنا بالوصول للكرسي ...
لكن نجحنا بصناعة جيل وطني حر ... فالكرسي ماكان هدفنا ... الكرسي كان وسيلة لخدمة هالارض .. بس راح نظل نخدمها بكل مكان و بكل وقت

تشرفت بمعرفتكم و بالعمل معاكم ... انتو مو مجرد اعضاء بحملة انتخابية ... انتو صرتوا جزء من حياتي و سندي و سند هالأرض
ما أنكر إني خايفه من المستقبل .... لكن وجودكم طمني و راح تظلون مصدر أملي و أمل الكويت بمستقبل افضل

-3-

لأول مره أخوض هالتجربة
لأول مره أكون مندوبة للمرشح بأحد اللجان

كانت تجربة حلوة بالرغم من التعب و حرقة الأعصاب و اليوع و برد التكييف

(أسرى مو مناديب)
خصوصا لمن يكون القاضي شايب ما يسمع ولا يشوف و يعاني من وسواس قهري
تخيلوا ان بدينا الفرز الساعة 9:13 و ماخلصنا الا الساعة 5 الفير و السبب شنو؟؟
السبب ان القاضي مسكين يفرز و يعد ... يحس انه غلط ... يرد يعيد العد من اول ويديد و احنا هذي حالتنا !!! نفرز ونعد و قاضينا يفصل و يعيد!!

و بعد ما عطيته نظرتي التشخيصية اكتشفت انه يعاني من الوسواس القهري

حاولت بكل الطرق و الوسائل اني اساعده و كان جزاي انه يعصب و يقفل علينا باب اللجنه و يمنعنا تكرمون حتى من روحة الحمام

شفتوا اللي يمنعونه من الحمام شيسوي ؟


قــــــبــــــل

بــــــــــــــــــعـــــــــــــــد

بس بالرغم من كل اللي سواه فينا كان من النوع اللي يدش القلب يعني مهما يسوي اشياء تنرفزني كنت اضحك و احبه اكثر