Tuesday 21 October 2008

شاركوني الأمل - الحلقة الأولى



قبل حوالي شهر و نص بديت أول كورس لي بالدراسة
و كحال كل الطلبة رحت أول يوم علشان أستلم الجدول الدراسي
علماً ان الجدول موحد يعني مو احنا اللي نختار المواد ولا الاوقات
.
.
.
.
استلمته من موظفة التسجيل و ألقيت نظرة سريعة عليه

أنا : ليـــــــش ؟؟

الموظفة : شنو ليش ؟؟

أنا : في بجدولي مادة (الثقافة الاسلامية) ليش ؟ أخاف غلطانين

الموظفة : لا مو غلطانين

أنا : بس احنا دراسات عليا و تخصصنا فرع من فروع الفئات الخاصة ماله أي صلة بالثقافة الاسلامية..
و بعدين صارلنا 12 سنة ندرس اسلامية و بالجامعة فيه مدخل ثقافة اسلامية
أعتقد كافي !!
لو تحطون لنا مواد تخدم تخصصنا الدقيق بيكون أفضل

الموظفة : هذا متطلب أساسي و أنا كل اللي علي اني اسلمكم الجدول
.
.
أدري انها مالها شغل .. بس ما عندي أحد اشكيله اللي بقلبي
:)


المهم
داومت محاضراتي لين يا وقت محاضرة الثقافة الاسلامية

و انا بطريجي لها قعدت أفكر
شنو صلة هالمقرر بتخصصنا !!
قلت يمكن يبونا نتعرف على حقوق المعاق بالاسلام
و عن نظرة الاسلام للمعاق و الخ ...
.
.
.
.
.
وصلت القاعة
و فجأة

دخـــــــل المـــعــــرس

أقصد دخل الدكتور
بس الزحمة اللي وراه تقول انه معرس مو دكتور

بس اتضح لي انه ماهو الا نوع من انواع النفاق الاجتماعي - الديني

يا جماعة الخير
احنا طويل اليوم مروا علينا انواع مختلفه من الدكاترة
ما شفت احد من الطلبة سلم عليه او حتى ابتسم بويهه
لكن دكتور الاسلامية
مسوين له زفه
ماكان باقي الا اييبون فرقة بن حسين ولا فيروز للهبان
اللي يسلم عليه ويبوسه
و اللي يشيل عنه جنطته
و اللي يسبقه عالطاولة و يدني له الكرسي

!!

اشدعـــــــــوة
اش هالخبة
!!

أثاري دكتورنا أحد الشيوخ اللي يقدمون أحد البرامج على أحد القنوات
:)

ألقى نظره سريعه عالقاعه
و وقف و بعد ما تكحكح و تنحنح

و قال : (حشاكم ) في أحد مو مسلم اهني معانا بالقاعة؟؟

ليش حشاكم ؟؟؟؟ يايب سيرة انسان ولا حيوان

ردوا عليه بحماس: لااااا الحمدلله كلنا مسلمين

بعدين
سرد لنا سيرته الذاتية على النحو التالي:

أنا فلان ابن فلان الفلاني
أنا حاصل على الدكتوراه من امريكا
أنا كنت مدير أحد الجامعات
أنا مقدم برامج تلفزيونيه
أنا متزوج ... (وهو يقول هالعبارة لف صوب البنات) انا ما اطالع اي بنت لان زوجتي ماليه عيني و تغنيني عن كل نساء الدنيا

شكووووو؟؟

أنا عندي أبناء والحمدلله .. ابنائي غير متأثرين بالغرب
أنا احب المســــاكيـــــــــن والـــــــــفــــــقـــراء

(هالعبارة يقولها مع ايماءات عادل امام)
أنا اذا نويت أعمل خيرا أعمله
من ضيقة الخلق قعدت وسويت له جدول تكراري
اش كثر قال
(أنا)
.
.
.
.
خلصنا سيرته الذاتية

يينا حق توصيف المقرر و اهدافه

اتهقون شنو يا جماعة؟؟


دكتورنا يقول ان اللي ياي يبي يدرس و يبي كتب واختبارات لا يقعد بالقاعة
(عاد انا ابيها من الله)

لان مو هذا الهدف

عيل شنو الهدف يا فضيلة الشيخ؟؟

الهدف ان هذا مو (كلاس) هذا (منبر) لان احنا حسب وجهة نظر الدكتور مو يايين ندرس
يعني انا متغربه وهاده اهلي وديرتي مو يايه ادرس!!! عيل يايه شسوي ؟؟ اقشر بطاط؟؟

فضيلته وضح لنا ان هالمقرر الهدف منه مو الدراسة

الهدف منه خلق جيل من الشباب المتدين لوحدة هذه الامة وتحرير فلسطين

يعني ابشركم آخر الكورس بحرر فلسطين


.
.
.
.

بعد استعراض اهداف المقرر
قرر فضيلة الدكتور الشيخ انه يقول لنا بعض التعليمات

من الاوامر :

اذا اخترنا موضوع البحث العلمي المطلوب منا
لازم نصلي صلاة الاستخارة
:))

ترا مو قاعده اتغشمر ولا اتطنز
اهو حاط (صلاة الاستخارة) ثاني خطوة من خطوات البحث العلمي بعد اختيار موضوع البحث


و من النواهي :

ما يبي يشوف أي طالب و طالبة قاعدين يتكلمون مع بعض
أو ينقلون اي شي من بعض

(يعني فضيلة الشيخ الدكتور ياي يربينا من اول ويديد !!! )
.
.
.
.

فضيلة الشيخ الدكتور
ظل طول المحاضرة يصرخ لين انبح صوته

اخواتي
الحــجـــــــــــاب فـــــــــــرض
و السفوووووور حرامٌ حرامُ حرااااااااااااااااام
المتبرجات بالنااااااااااااااااااااااار


يوم التفت ولا نص القاعة شباب و النص الثاني متحجبات
يعني الكلام لي يا جارة


.
.
.

سؤال الحلقة

في ظل الحقد المتبادل من أول نظرة
تهقون في أمل أنجح؟
:p