Monday 11 February 2008

سندريلا و الساعة 1:45 :p


على طاري موضوع الاختلاط

اليوم وانا بالدوام اتصلت بأحد الدكاترة

أنا : ألوو .. دكتور اشلونك
الدكتور : هلااااااااااااا وطن اشلونج وشلون الأهل
أنا : الحمدلله بخير ... انت اشلونك دكتور متى دوامكم ؟ أبي امركم علشان اطلع شهادة تزكية حق الماجستير
الدكتور: يــــه هذي الساعة المباركة ابنيتي..دوامنا الأحد الياي بس تعالي بعد ساعة انا بكون موجود بالجامعة


أخذت بعضي و طرررررررررت عالجامعة :)

الللللللله ياني كنت مشتاقتلها

صارلي 3 سنين مفارقتها

دخلت الجامعة .. ولا الدنيا معفوسه صايره ارض و قرض مو جامعة
ماشوف غير الحدايد و الخشب و الرمل و الاسمنت





الصراحة انا احترت لمن شفت هالتحذير

شلبس ماعندي خوذة
:S

تـــــحذيـــــــر
يا طلاب و يا طالبات الجامعة
كلمن ياخذ خوذته معاه و يروح جامعته ... لا تقولون ما قلت لكم

بس الاخوات ذوات الحجاب (بو تفخه) ماله داعي تاخذون خوذه ... خوذتكم منكم وفيكم




قاعدين يبنون و حاطين حواجز بكل صوب .. ممنوع المشي ورا هالحواجز تفادياً للفلعات




هذا منظر صرح اكاديمي !!
:(
ترا الدوام بقا عليه 5 ايام



الله يا هالساعة لها ذكريات :) كله كانو يحطون صورتها على فايلات القوائم
BIG BEN

الكويت



الله يرضا !!!!!
هالسيارة البوتمبه توقف بمواقف الدكاتره و انا اوقف بعيد و اطقها كعابي :((





هذي بعد عربانة الرمل سافطه بمواقف الدكاترة وانا واقفه بعيد

انا اوريكم ... كلها جم سنة انشالله و اصير دكتوره و ادخل بسيارتي لي مكتبي
:p


المهم
اني دخلت .. و ما اخفي عليكم .. اخنقتني العبرة و ادمعت عيني
ولهااااااااااااااااااااااااااانه على كل قطعة بالمكان
تمشيت بالممرات ..
وقفت عند الكلاسات الي درست فيها
المكان الي كنا نحط فيه مقراتنا الانتخابية

ذكريات 4 سنوات مرت جدامي مثل الشريط
ضحك
بجي
دراسه
انتخابات
نتايج
امتحانات
صديقاتي
مواقف محرجه
طيحات و زلقات :)


رحت القسم و كنت طايره من الفرحه و انا اشوف دكاترتي
من كثر الوله كنت اسلم على اللي اكرهم قبل اللي احبهم
والله كان ودي ألمهم :)

و خلصت اجراءاتي و طلعت شهادة التزكية
كانت فيني مشاعر متناقضه

مشتاقه حق الجامعه
فرحانه اني قاعده اسوي اجراءات الدراسات العليا
مضايقه لان بدا العد التنازلي للدراسه واللسفر و توديع الكويت
كانت مشاعر عجيبه و يبيلها بوست بروحه



الحين يا وقت طلعتي
اشوف ولا الساعة 1:45

:S

تدرون يعني شنو
1:45
!!!

يعني بالعادة هالحزة انا اكون راده من الدووووووووام و متغدية و احتمال نايمه بعد
حاطه ايدي على قلبي خايفه تصيدني الزحمة



و صار اللي توقعته
اول ما طلعت من باب الجامعة ولا السياراااااات ساتوووووووول
لحظه يا جماعة!! شوي شوي علي شنو هذا !! انا من زمان ما شفت هالزحمه
احنا مدلعين.. 12:15 بالكثير طالعين من الدوام يعني ما اشوف زحمة الظهاري ولا هي تشوفني




فوق هذا كله مطرت شوي
بس بالرغم من كل هذا رحلة الجامعه كانت اكثر من رائعه
و يا ليت يا ليت .. يا لمبه :)
يليت ترجع جامعتنا مثل ما كانت ... جامعة راقيه خاليه من السيطرة الاخونجيه

يا جماعة
لا تنسون المهرجان الخطابي باجر بالجمعية الثقافية الاجتماعية النسائية بالخالدية الساعة 7 مساءا
بإذن الله راح نغطي المهرجان الخطابي من خلال المدونة :)
نـــــــشوفكم على خيــــــــــر