(1)
في كل عام دراسي يديد ادز لنا جامعة الكويت مجموعة من الطلبة و الطالبات ندربهم في مكان شغلي علشان يستوفون مقررات التدريب الميداني قبل تخرجهم.
في أحد الكورسات كانت عندي طالبة غريبة الأطوار !!
تدخل الدوام بالعباية ...
تقطها بمكتبي
و تطلع تسوي شغلها طول اليوم بلبس ضيج و مكياج صارخ .. حتى الطالبة السفور الي معاها شكلها محتشم اكثر منها
انا مالي شغل بشكلها اهي حرة .. لكن اللي حيرني بالموضوع ليش تلبس العباية !! و من البيت لي باب الدوام بالذات !!
يعني لو كان المكان اللي نشتغل فيه نسائي 100% جان ما استغربت منها ... لكن احنا نشتغل بمكان عدد الرياييل فيه يفوق عدد النساء بوايد.
اشتغلت اللقافة عندي ...و في يوم سألتها
أنا : فلانة ليش تلبسين العباية من الاساس دامها تعيقج بشغلج ؟ و الصراحة مالها داعي يعني انتي تلبسينها بطريجج و اهني قاطتها و الرياييل اللي بالشارع نفسهم نفس الرياييل اللي يشتغلون معانا
اهي : و من قالج أنا لابستها حباً فيها ... العباية انفرضت علي فرض من الثانوية ... أنا مجبورة عليها ماقدر اطلع من البيت من غير ما اكون لابستها لان لو شافني أحد من جيرانا أو اهلنا من غيرها بينقد علي و يتكلم عني و محد يتزوجني !!!! لكن اهني محد يعرفني و لا اعرف احد.
-----------------------------------------------------------
(2)
لمن كنت بالابتدائي كانت عندي صديقة اسمها (ميري) ... ما كنت احس بأي فرق بينها و بين أي طالبة ثانية
بالمتوسط عرفت ان صديقتي (ميري) من عايلة كويتية مسيحية ... فزاد احترامي لها لأنها منتظمة بحصة التربية الاسلامية أكثر من غيرها
لأنها تحفط الآيات المقررة علينا في الوقت المحدد
لأنها ما تاكل و لا تشرب و لا تسوي اي شي يمس مشاعرنا برمضان
لأنها تهنينا بعيد الفطر و العيد الأضحى
علمتني (ميري) اني احب و احترم الانسان لانسانيته
أمي و أبوي كانوا يشترون لي بطاقات معايدة و هدية علشان اقدمها لصديقتي بالكريسمس..كانت فرحتها ما تنوصف بالرغم من بساطة الهدية
بالثانوية انتقلت صديقتي لمدرسة ثانية...مرت الأيام و تخرجت و دخلت الجامعة
و بيوم من الأيام كنت أمشي بطريجي لقاعة المحاضرات ...سمعت صوت يناديني ...التفت ولا (ميري) تركض صوبي و تحضني
كنت متلهفه ابي اسمع اخبارها و اهي نفس الشي
عرفت ان هذي ساعة فراغها ... فكشًت بمحاضرتي علشان اقعد مع صديقتي القديمة
:)
عرفت انها مو مرتاحة و ودها تسافر تكمل دراستها برا...كنا نتمشى و نسولف....و اسألها عن سبب رغبتها بترك الكويت...و طول ماحنا نمشي كنت ألقى إجابات على اسألتي في عيون الطلبة و الطالبات حوالينا..نظرات الاستغراب كانت تلاحقنا و مجرد مايشوفون الصليب برقبتها يبدي الهمز واللمز و نظرات الاشمئزاز و خصوصا لمن مرينا عند مجموعة من بنات اللائتلافية ما سلمنا من النغزات من نوع
(استغفر الله عسى الله يهديكم)
(يالله حسن الخاتمة)
حسيت بمدى جرح صديقتي
و كانت هذي المرة الأولى و الأخيرة اللي اشوف فيها صديقتي بالجامعة...و بعدها قامت البنت و حولت اوراقها لأحد الجامعات المصرية و للحينها هناك.
صديقتي...اعذريهم ... هذيل ناس جهلاء ما يدركون انج انسانه قبل كل شي
صديقتي...اعذريهم ...هالناس يجهلون انج مواطنة كويتية حالج حالهم و لج حق انج تعيشين بديرتج بسلام
صديقتي...انا آسفة لأني ما قدرت ادافع عنج
صديقتي...لج حق تختارين الدين و المعتقد اللي تبينه و لكن هذا المفهوم مفقود عند اعيال ديرتي...ديرة الدستور.
------------------------------------------------------
(3)
من باب الصدفة الجميلة اني اشتغلت بنفس المكان اللي تشتغل فية والدة صديقتي (ميري) لكن بإدارة مختلفة
و تلاقينا بأحد المناسبات بادارتنا و كانت معاي موظفة يديدة
سلمت على والدة صديقتي و عرفتها على الموظفة اليديدة فصافحتها و رحبت فيها و شجعتها
و دار بينا حوار قصير سألتها فيه عن بنتها (صديقتي) و عن اخبار دراستها بمصر و بعدها مشينا انا و الموظفه اليديدة
و احنا بطريجنا للمكتب اسألتني
الموظفة اليديدة : هذي المديرة كويتية ؟؟
أنا : إي كويتية و قديمة بالمجال و خبرتها كبيرة ... ماشالله عليها كفاءة واللي يشتغل معاها محظوظ بيستفيد منها وايد
الموظفة اليديدة : في كويتيين يسمون بناتهم (ميري) ؟؟
أنا : إي في
الموظفة اليديدة : (تضحك) غريبة !! أول مرة أسمع
أنا : اهي كويتية مسيحية علشان جذي (ميري) اسم دارج عندهم
فجأة
اللي معاي صارت فيها حالة هستيرية
قامت اطامر و تسأل عن اقرب دورة مياه
تعتقدون ليش ؟؟؟
لا يروح بالكم بعيد ... اهي تبي دورة المياه مو حق الشسمه
للأسف الموظفة اليديدة يت لها حالة هستيرية و اشمئزاز و تبي تغسل ايدها لأنها صــــــافـــــحــــــــت المديرة المسيحية
و على فكرة .... الشغل اللي نشتغله فيه مبدأ اساسي و هو تقديم الخدمة للانسان و تقبله بغض النظر عن لونه و جنسة و اصله و دينه
لا تعليق الصراحة
-------------------------------------------------
(4)
على ذمة الراوي
في وحده من رواد الحسينينات بشكل شبه يومي... و هالمرا (تتميلح) حق اهل (السادة و شيوخ الدين) و تتلزق فيهم
المهم
ان هذي المرا دايماً تغطي ويها (تلبس بوشيه) لكن مره شافتها وحده من الحريم الملاقيف بالسوق و ويها مكشوف من غير بوشيه و سألتها
(أم فلان ... انتي تغطين ويهج بالحسينية و لا انا يتراوالي ؟؟؟)
ردت عليها ام البوشية
( اي انا البسها لي بغيت اروح الحسينية بس لان مرت السيد الفلاني هناك و بنت الشيخ العلاني هناك)
و الله حاله !!
ما اقول الا مثل ما قال محمود الكويتي
(قووووومي اوقفيلي و ارفعي البوشيه خليني اروي ضاميي العطشاني دم جك جك دم طخ)
ياحلات السامري والله
-----------------------------------------------------
(5)
المكان : لوبي أحد الفناق الاوربية
الزمان : يوم من ايام اجازة الصيف
كان قاعد عمي باللوبي يقرا الجرايد و يت اقعدت يمه بنت ام 17 سنة تقريبا .. المهم هالبنت ام الويه الحلو و الشعر الأحلى استعارت منه الـ travel guide
و قامت تسأله عن احلى المتاحف و المحلات اللي زارها .
اختفت هالبنت فجأة
و بعد ربع ساعة تقريبا ... جبلت عليه وحده منقبه رجعت له
الـ travel guide
و اشكرته
استغرب ... و قال : انتي اللي كنتي يمي قبل شوي ؟؟؟
قالت : إي انا
قال : علامج يا ابنيتي انقلبتي حصان ؟؟
قالت : شفت ناس من اهلنا مروا و رحت لبست قبل لا يشوفوني
اللهم لا اعتراض على قولت
eng_q8
:))
----------------------------------------------
(6)
تقاعد احد المدرا من ادارتنا ... انا شخصياً ما عاصرت هالمدير الا جم شهر فلما تقاعد ما حسيت بأي مشاعر سلبية او ايجابية ... لكن هالمدير كان معروف بحبه (للتقلقس) و (التحيلق) خصوصاعند الاشخاص اصحاب النفوذ
المهم
ادارتنا سوو حفلة لتكريم موظفينها المتقاعدين ...كنت قاعدة بعيد اراقب الوضع و لاحظت ان هالمدير المتميز (بالتقلقس) كان يرفض مصافحة زميلاته العيايز اللي قضى معاهم اكثر من 30 سنة بالادارة
اهو حر ... كيفه ... لكن فجأة تذكرت لــــــقــــــطة دولــــــــــــــية فأشتغلت النذالة و اصريت اني احرجه فيها
:p
قمت من مكاني و رحت له
قلت : بو فلاااااان اشلونك؟
قال : هلا وطن هلا (و هو حاط ايده على صدره علشان يبين انه ما يصافح) عشتو
قلت : هاوووو بو فلان انت ما تصافح ؟؟ (بدا الاستعباط )
قال:لا يا يبه ما اصافح ما يجوز ما يجوز
قلت : بس عادي يا بو فلان هذيل زميلاتك و مثل خوانك و بينكم عشرة عمر ما فيها شي اذا حبوا يسلمون عليك خصوصاً ان تقاعدك و طلعتك من الادارة أثرت فيهم وايد
قال : لا لا ما يجوز ما اقدر اصافح حريم
قلت : بس يابو فلان انا اتذكر ان اول ما اشتغلت و سوينا الحفلة العودة و دعيت الشيخة فلانة و الشيخة علانة صافحتهم ...حتى في لك صورة للحين معلقينها بالادارة و انت تسلم عليهم...يعني اهما حلال و زميلاتك حرام !!
قال: بس يا وطن هذيل شيخات و متبرعين لنا بمبلغ زين حق المؤسسة
-------------------------------------------------------------
ملاحظة
جميع القصص و الشخصيات الواردة بالبوست اعلاه حقيقية 100% و ليست من نسج الخيال
و لا اقصد الإساءة للدين و لكن اردت كشف المتسترين به
و ما خفي أعظم
و الدين بريء منهم و من افعالهم
.jpg)
.jpg)
.jpg)
