ZWAIZتامر أمر يا

-1-

بناءاً على مطالب الزميل

zwaiz

قررت خوض الانتخابات البرلمنية

لا !!

أقصد قررت إني انزل بوست يديد

على الرغم من انشغالي و ضغط الدراسة اللي مسببتلي مشاكل نفسية و اجتماعية و صحية و عاطفية وتساقط الشعر

ولهانه عليكم و في بالي وايد أفكار بس بحاول اختصرها و اجمعها كلها في هالبوست اللي احتمال ما تشوفون غيره الا بعد اختبارات الفاينل

-2-

هذي اول انتخابات اكون فيها براالكويت

بس ماعليه شكلي راح انتخب السنه اليايه بعد بنفس الوقت

;p

الياس جاسيني من راسي لريولي .. من كثر الكلام اللي بقوله بخصوص وضع الديرة ماني قادر أعبر

بس كل اللي بقوله لكم

تــــــــكــــــــفون

تــــــــكــــــــفون

تــــــــكــــــــفون

علشان الكويت ... حكموا ضمايركم هالمره

اختاروا اشخاص يرجعون لنا الكويت مثل ما كانت

ترا والله تعبنا

by the way

اللي عنده اي فكره حاب يسهم فيها خل يزور مدونة

علشان الكويت

http://For-Q8.blogspot.com

ولا يبخل عليهم .. علشان الكويت

أنا عن نفسي ما باليد حيله لكن بحاول أساعدكم باللي اقدر عليه ولو عن بعد

بس وعد مني

اني ارجع الديرة يوم التصويت

و أأدي امانتي جدام امي الكويت

علشان يرتاح ضميري

-3-

قلبي يعورني

أدري مو شي يديد

بس صج قاعده تصير جدامي سوالف هاليومين يشيب لها الراس

من سافرت و انا كل يوم من اصبح لين امسي احمد ربي مليون مره اني كويتيه

الطالب الكويتي ولله الحمد ماعليه قاصر

قاعدين نسكن بأحسن الاماكن

و مانخلي على نفسنا قاصر بأي شي

و معاشاتنا تنزل فوقها الاعانه و فلوس الكتب وغيرها

و مع هذا والله ان ولاشي من هذا يسوا وحنا بعاد عن الكويت

ودنا نخلص بأقرب وقت ونرجع لها

و لكن اللي بالفعل يقهر

ان في ناس للاسف محسوبين عالكويت و ياكلون من خيرها ويمشون ايدهم عالطوفه وماهم شبعانين

كل هذا مو تارس عينهم !!

تخيلوا ان بعض الطلبة

واللي للاسف يدعون الدين و التدين والالتزام اهم اكثر ناس ناهبين الديرة

بعض الاخوة الافاضل و الاخوات رايحين يايبين ورقة طويلة عريضه من الملحق الثقافي

فيها كل التسهيلات المتاحة للطالب الكويتي

اللي تكون حق من حقوقه

-اذا كان بحاجه لها-

يعني مثلا ( لو) و نحط تحت لو مليون خط

لو الطالب ماعنده لاب توب

يقدر يأجر لاب توب و الملحق يصرفون له ما يعادل 200 دينار للتأجير

لكن لو انت عندك لاب توب !! هالحق ما يعتبر حق

لكن ضعاف النفوس إهني اشسووا ؟؟؟

بمساعدة من الملحق الثقافي قبل ما يمشي و على ابو انه - ولد عمٍ لهم- قال لهم روحوا ييبوا اوراق تأجير مزورة من المحل الفلاني و انا بمشي لكم الفلوس

(علباله من جيبه)

والربع ماقصروا .. فبعد التفنن ببوس خشم الملحق المثقافي اركضوا يابو اوراق تأجير مزوره

و أنا ماحطيتها بقلبي

مسكت احدى الاخوات الفاضلات اللي مو امبين فيها الا عيونها وقلت لها

اشلون تسوون جذي !! انتي اكثر وحده تفترض انج تستحرمين هالشي

طبعا فتاويهم بمخباتهم كالعاده

تتوقعون اش قالت ؟؟

قالت ان اللاب توب اللي عندها بالبيت مو لها

اللاب توب لريلها

واهي بتاخذ الـفلوس و بتعطيهم ريلها و جذي يكونون حلال

!!

اهم مازوروا اوراق

اهم زوروا ضمايرهم وخانوا الكويت قبل أي شي

ما يعادل 200 دينار !!! اشراح تزيدكم ؟؟ هل راح تغنيكم ؟؟

بتفرق معاكم وااايد؟؟

والله ان الواحد بالغربة وده يدفع كنوز الدنيا بس يرجع للكويت

لي هالدرجة الكويت رخيصه عندكم؟

و انت يا مستشار الملحق الثقافي

ياللي عمرك ماراح تمثل ثقافة الا ثقافة النهب

ولا عمرك راح تمثل الكويت لانك للحين متقوقع بقبيلتك

هذي المباديء اللي تعلمها طلبتك؟؟؟

يــــا حسرة قلبي عليج يالكويت

بس شقول ؟!؟

لا تلومونهم !! هذا نتاج التجنيس العشوائي .. ياب لنا ناس متعودين على ثقافة غزو الاراضي ونهب خيراتها و اخذ الغنايم والرعي فيها لحد ما تصفر

وقتها بس يفكرون يرحلون ويشدون بديرة ثانية

هذا اللي حاصل

الكويت كانت الغنيمة العودة لهم

ومازالوا يرعون فيها

بس لي الوقت إللي يخلص مايها وزرعها ومايلقون اللي يسد يوعهم فيها

ماراح تلقون الا اغبرتهم وراهم

أنا آسفة

لكن عقب هالشي صرت كل يوم ادعي

يارب يخلص النفط

نبي نرجع أيام الفقر ... نبي نعيش في بيوت من طين ... نبي ناكل خبز يابس .. ويمكن إنام من غير أكل

بس ديرتنا اهي ديرتنا

وناسها اهم ناسها

ويظل فيها الا اللي يعشق ترابها

-4-

والله وكبرتي

حبيبتي ورفيجتي و اختي

dearkuwait

هذا اول عيد ميلاد ماكون معاج فيه مع انه اهم عيد ميلاد

:)

بس دامج بصحة وعافية هذا أهم شي

كل عام و انتي بخير ياللي قبل 18 سنه كنتي تنامين بخضني

والحين استحي اوقف يمج

;p

انتي الوحيدة اللي شفتيني بكل حالاتي

شفتيني بوناستي .. بضعفي ... بقوتي ... بانكساري .. بخوفي

واللي منكم يعرفنا على أرض الواقع راح يدرك كلامي

عسى الله يخليج لنا ويالله عاد كبرتي تزوجي وييبي لنا حفيد ترا العايلة قربت تنقرض

;p

مابي اكتب اكثر لاني قربت ابجي

-5-

عندما تعلم انك محور اهتمام احدهم في هذا الكون .. وليس محور اهتمامه فحسب .. بل قلبه النابض الذي لا يقوى على الحياة من دونه

ورغم هذا كله

يقف قلبك ساكنا دون حراك

فترتاب من تصرفاتع المجنونه !! ما خطب هذا القلب الساكن ؟؟

ما اقساه !!

كيف يقوى على رؤية عذاب الآخر و يصمت !!

فتتساءل

أ الى هذا الحد جف قلبك من المشاعر ؟؟؟

أم ان هناك من سكنه دون وعي منك وقفل جميع الأبواب خلفه

!!!

مجرد تساؤل

-6-

أدري السالفة صارت خلطبيطه بس هذا مخزون شهر كامل

طلعت كل اللي بقلبي

و راح اغيب عنكم فترة لدواعي الدراسة

و القاكم على خير

ولا تنسون تستقبلوني بالورود وتفرشون لي الزل الاحمر بالمطار يوم الانتخابات

;p

سلمت للمجد

إنـــي لأبــــذل نــفـــســـي بـــلا ثــمـــن

حـــتـــى أراك كـــمـــا أهـــواك يــا وطـــنـــي

كل عام و انتو بخير

كل عام و الكويت بألف خير

و تبقى العلمانية هي الحل

من بديهيات العمل التربوي ان كل قسم بالمدرسة يقوم بتدريس مادته العلمية
يعني قسم اللغة العربية يدرس الطلبة عربي
و قسم الرياضيات يدرس الطلبة رياضيات
و قسم العلوم يدرس الطلبة علوم
و قسم الموسيقى يدرس الطلبة موسيقى

حتى الأنشطة الاثرائية او الترويحية لكل قسم تكون مرتبطة بالمادة العلمية


عدل ولا أنا غلطانه ؟؟

و اعتقد ان هالبديهيات الكل يعرفها
من الوزيرة نورية الصبيح
حتى اصغر فراش بالتربية

لكن في الحقيقة يبدو ان الموازين كلها تتغير لمن يبدي حس التأسلم يدخل مدارسنا
فمن بداية تغلغل التيار المتأسلم في المؤسسات التربوية ابتداءاً من المدارس حتى جمعية المعلمين الكويتية –التي كانت معقل من معاقل الليبرالية – و نحن نشهد تصرفات غريبة من هؤلاء !!

جميل ان نعلم اطفالنا الصلاة
و جميل ان نذكرهم بضرورة بر الوالدين
و جميل ان نعلمهم القرآن
و لكن اللي مو جميل إطلاقاً ان تكون هذي الانشطة خارج نطاق قسم التربية الاسلامية بالمدرسة
!!

اقروا معاي هالخبر المنشور بجريدة الآن
بتاريخ
15/01/2009

اقامت مدرسة عبدالله الرومي محاضرة تحت عنوان وصايا مهمة للشيخ فهد فريج الجنفاوي ، وقد تحدث الجنفاوي في اول هذه الوصايا المحافظة على الصلوات الخمس في اوقاتها ، وان هذه العبادة هي الصلة بين العبد وربه وهي سبب التوفيق ومفتاح الرزق وطريق سهل موصل الى الجنة ، وثاني هذه الوصايا هو بر الوالدين والحرص على طاعتهما كما قال الله تعالى (( وبالوالدين احسانا )) ، وثالث هذه الوصايا هو حفظ القرآن الكريم والإشتراك في حلقات الحفظ ، وان ذلك يكون سبب في الباس والديه تاج الوقار يوم القيامة ، فيقول الوالدين من اين لنا ذلك فيقول الله بتحفيظ ولدكما القران ، ومن الوصايا ايضا اختيار الصحبة الصالحة والحذر من الصحبة السيئة ، لأن الصاحب ساحب وكما قال النبي صلى الله عليه وسلم ( المرء على دين خليله ) ، وايضا من الوصايا الحرص على التميز والتفوق في الدراسة ، لأن بلدك وهي الكويت واهلك ووالديك بحاجة اليك والى تميزك في التعليم ، وبعد ذلك صلى جميع الطلبة صلاة الظهر في ساحة المدرسة ، وفي ختام هذا المحاضرة شكر الجنفاوي ادارة المدرسة على حرصها على تنويع النشاطاتة تنمية المهارات والبرامج للطلبة .
مشروع الولد الصالح
وكانت هذه المحاضرة ضمن فعاليات مشروع الولد الصالح والذي يقيمه

قسم العلوم

بمدرسة عبدالله الرومي بمنطقة صباح الناصر ، ويهدف هذا المشروع الى تعزيز
القيم الاسلامية والاخلاقية مثل الصدق والأمانة احترام الكبير والتحذير من السلوك
السيئ المخالف للعادات والتقاليد ، ولاقى
هذا المشروع استحسان كثير من أولياء
الأمور حيث كان لذلك المشروع الأثر الإيجابي الواضح على أبناءهم
الطلبة.

يا جماعة
انا مو معترضة على المشروع
بلعكس ماقصروا وعساهم عالقوة
بس اعتقد ان هالاشياء من اختصاص قسم التربية الاسلامية
!!
و انت كمدرس علوم بدل ما اتضيع وقتك بأشياء مو من اختصاصك
ولا لها صلة باختصاصك
كان من الاجدر انك اتسوي انشطة علمية
اشفيها لو سويت مشروع
(العالم الصغير) (أفضل اختراع)
و اذا انت متحمس لي هالدرجة ليش ما صرت مدرس تربية اسلامية
!!

وينج يا نورية الصبيح
لحقي على اعيالنا

مدارسنا قربت تصير
إلا صارت أوكار لغسيل المخ
ما كفاهم ادخلو الجامعه والمعاهد واعفسوها
هالمرة لفوا على اعيالنا

هالناس خططهم معروفة ومكشوفة
اليوم الولد الصالح
باجر شباب الصحوة
و اللي عقبه رجال الجهاد



بس اتصدقون الشرهه مو عليهم
الشرهه على المدرسة والمدير و الموجهين اللي يشوفون هالسوالف وساكتين
لو مدرس موسيقى او بدنية كانوا مسوين نشاط استعراضي او موسيقي جان من ثاني يوم نسمع نهيق بعض الناس و تهديداتهم باستجواب وزيرة التربية

لكن الشكوى لله
و على قولت الباش مهندس

اللــــــهــــــم لا اعــــــتـــــراض

أما آن الأوان يالمحري ؟؟

كنت اتابع مقابلة النائب محمد العبدالجادر على قناة سكوب الاسبوع الماضي عندما استوقفتني مكالمة أحد المتصلين

شكى هذا المتصل تعسف ذوي اللحى الطويلة والثياب القصيرة

شكى ظلمهم

شكى جهلهم

و حلم كما نحلم جميعا برجوع كويت الحرية

كويت الحياة و الديمقراطية

و بآخر المكالمة ألقى القنبلة التي أثارت فزع المذيع و حاول بشتى الوسائل تغيير مسار حديث هذا الرجل

خوفاً من أن يتم إغلاق قناتهم على يد (لحية) من اللحى

فهو يدرك تماماً أن سلطتهم أقوى من سلطة

(إمبراطورتهم)

كانت عبارة

(أنا كويتي ليبرالي علماني)

والتي قالها المتصل عبدالله المحري و عجز الآلاف غيره عن قولها هي القنبلة التي أثارت فزع المذيع و للأسف فزع النائب أيضا و الذي من المفترض أن يكون هو أحد أهم المدافعين عن حرية الفكر

و على العكس تماماً فقد كان لهذه الكلمات مفعول السحر علي

جعلتني أطير في آفاق الحرية الرحبة و أحلم بمنبر للفكر الحر تكون له وقفة شرسة في وجه كل من تسول له نفسه للعبث في حرياتنا

فقد سئمنا خزعبلاتهم و أنهكنا تسلطهم الديني

كم هو مؤلم أن نرى حرية الفكر و الكلمة تُغتصب في أرض الحرية

كم هو مزعج أن نرى إقحام الدين في مؤسسات الدولة المدنية و فرض الدين على الناس بالاجبار

فهل يعقل

!!

هل يعقل أن تُمنع الحفلات الغنائية من أرض الفن الأصيل

هل يعقل أن يُمنع التعليم المشترك في أرض الدستور

هل يعقل أن يُمنع تدريس مادة الفلسفة من أرض حضنت في ثراها د . أحمد الربعي

هل يعقل أن تُمنع الاصبوحات الشعرية في المدارس من أرض الشاعر فهد العسكر

هل يعقل أن تُمنع الكتب في أرض حضنت أرقى المثقفين و الكتاب

هل يعقل أن يتم المطالبة بهيئة الأمر بالمعروف و النهي عن المنكر من أرض كان يحكمها الشيخ عبدالله السالم طيب الله ثراه

و هل يعقل أن نرى و نسمع كل هذا الجنون و نأخذ (موقف المتفرج) أو بأحسن حال

(موقف المتحلطم)

!!

إلى أين أنتم سائرون بنا؟؟

هل تريدوننا طالبان أخرى؟؟

لكن من المتضح أن لا جدوى للحوار معكم

فأنتم كالطفل المدلل

( لماما حكومة)

و الذي تربى في أكنافها بنعيم و دلال و عندما كبر تمرد عليها من فرط الدلال

انتهى وقت الحوار و الجدال

نحن الآن بحاجة ماسه لوقفة حقيقية

و بحاجة إلى أن يكون في كل بيت كويتي

(عبدالله المحري)

ألم يحن الوقت لإعلان قيام أول تجمع ليبرالي علماني كويتي صريح؟؟

ألم

الليلة كان حالها حال كل الليالي

كنت أمارس طقوس ما قبل النوم من تجهيز كتب و ترتيب ملابس ...الخ

لين صارت الساعة

00:00

رن تلفوني و رحت له أركض ..

و كنت أتمنى أنها تكون مكالمة من الكويت

بس ما كنت أدري اني بوصل و أشوف شي يكدرني و يخلي هالليله غير عن باجي الليالي

تلفوني ما رن

تلفوني كان يصرخ

يبي يذكرني فيج

تذكير : اليوم عيد ميلاد بدرية 26

تجمدت بمكاني

كانت ثواني بس خذتني لسنين لي ورا

تذكرت فيها أول مره تلاقينا بالجامعة

و اشلون علاقتنا كانت تزيد يوم بعد يوم

تذكرت

بسمتج اللي ما كانت تفارقج

روحج الحلوة

برائتج

قلبج الطيب

أحلامج

أحلامج !!! إيه أحلامج الحلوة اللي شاركتج فيها لحظة بلحظه

حلم التخرج من الجامعة

حلم الماجستير

حلم الوظيفة

و تذكرت أحلى حلم

(محمد)

بس سألت نفسي اهو وينه الحين؟ للحين يتذكر بدرية ولا نساها ؟ للحين يحبها و لا حبه راح معاها؟

بدرية

يمكن فترة معرفتي فيج قصيرة

تعرفنا على بعض بأول أيامنا الجامعية ... و بعد 4 سنين أنا تخرجت من الجامعة

و انتي تخرجتي من الدنيا

و خذتني الايام

و نسيت أو تناسيت بدرية

لاني كنت اتعمد أوخر عن كل شي يذكرني فيج علشان ما أتألم

شفتي اشكثر انا انانيه؟؟ مابي اتألم

و انتي .. ياما و ياما تألمني من المرض

الله يرحمج يا بدرية

???

يحز بالخاطر يا كويت .. يحز بالخاطر غيابج

اعذرنا ... يا تاريخ

و ما بقا لنا الا عصر

مالنا فيه هوية

و لا حضور

*********

العذر كل العذر

لكل قطرة عرق

لكل قطرة دم

انزلت حشيمة للكويت

بس للاسف

ما بقا من يحشمكم

************

اعذرنا ... يا علم الكويت

يحز بالخاطر

اني احضر او اتابع اي دورة

و ادورك بين اعلام الدول المشاركة

و ما القاك

و يحز بالخاطر اكثر

ان اللي اخفوك من وجود الساحة الرياضية

هم اعيالك

**********

عذرا .. يالكرة

آخر ضحاياهم انتي

احسبوج

(ورث)

و تصارعوا عليه لين انتهى

مجرد تساؤل

من الضحية القادمة ؟؟